Darío, de 19 anos e estudante de Química na Universidade de Compostela aceptou O gran reto de Alingua. Nado na Coruña e residente en Ourense, Darío xa intentara o cambio lingüístico, mais as súas circunstancias persoais non fixeron doada esa mudanza. Agora, no gran reto, afrontará a súa inmersión lingüística durante tres semanas. Acompáñao nestes 21 días e comproba se tivo éxito nas diferentes probas que terá que superar, como tratar coa Administración ou ir de compras en galego. E non perdas os testemuños da súa contorna! Máis que interesantes!

Darío pasoulle o reto a Martiña, de 25 anos e natural de Noia. Con residencia na Coruña e con traballo no concello de Oleiros, só usa o galego para falar coa xente maior e en contextos máis formais. Mais Martiña ten medo de que o idioma desapareza, así que aceptou o reto de Alingua. Non perdades a oportunidade de seguir a Martiña mentres supera as diferentes probas do reto, e, sobre todo, non perdades as reflexións que tanto Martiña como a súa contorna fan sobre a lingua. Martiña tirará abaixo prexuízos e achegará experiencias de gran valor para comprender as posturas das persoas galegofalantes. Imprescindible!

Martiña, despois da súa inmersión lingüística, pasoulle O gran reto a Nelu Vermouth, actor, artista da performance e estudante de matemáticas. Nelu, aínda que recoñece que non se sente cómodo falando galego, aceptou o reto coa mellor das actitudes. Desde Ferrolterra aceptará os desafíos que lle propón Alingua, como falar coa familia en galego, enviar audios de Whatsapp, interactuar nas redes en galego ou ligar e tomar algo en galego. Reflexións da importancia dos medios na lingua que falamos, do vencello –ou non- entre lingua e posicións políticas, e testemuñas doutras transicións lingüísticas están presentes no percorrido de Nelu. E todo iso mesturado con humor e moita festa!

Despois do éxito dos nosos tres protagonistas, María Rúa despide O Gran Reto... Mais só na canle de YouTube!
O gran reto non é só unha serie de vídeos, é unha invitación a que vós participedes nel. Compartide o reto, os vosos avances, as vosas probas, reflexións, conclusións e dúbidas. E se xa es galegofalante, espalla o reto entre as túas amizades e xente coñecida. Estes vídeos foron só o primeiro paso!